ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯ ಮಂಗೋಲ್ಪುರಿಯಲ್ಲಿ ಬುಧವಾರ ಸಂಜೆ ಭೀಕರ ಹತ್ಯೆಯೊಂದು ನಡೆದಿದ್ದು, ಇಡೀ ಪ್ರದೇಶವನ್ನು ಆತಂಕಕ್ಕೆ ತಳ್ಳಿದೆ. 25 ವರ್ಷದ ಆಕಾಶ್ ಎಂಬ ಯುವಕನನ್ನು ನಾಲ್ಕೈದು ದುಷ್ಕರ್ಮಿಗಳ ಗುಂಪು ನಡುರಸ್ತೆಯಲ್ಲೇ ಬೆನ್ನಟ್ಟಿ, ಚಾಕುವಿನಿಂದ ಪದೇ ಪದೇ ಇರಿದು ಬರ್ಬರವಾಗಿ ಕೊಲೆ ಮಾಡಿದೆ. ಈ ರಕ್ತಸಿಕ್ತ ಘಟನೆಯ ದೃಶ್ಯಗಳು ಸಮೀಪದ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ನೋಡುಗರ ಎದೆನಡುಗಿಸುವಂತಿದೆ.
ಸಿಸಿಟಿವಿ ದೃಶ್ಯಾವಳಿಯ ಪ್ರಕಾರ, ಪ್ರಾಣ ಉಳಿಸಿಕೊಳ್ಳಲು ಆಕಾಶ್ ಓಡಿ ಹೋಗಿ ಮನೆಯೊಂದರ ಗೇಟ್ ಪ್ರವೇಶಿಸಲು ಯತ್ನಿಸಿದ್ದಾನೆ. ಆದರೆ, ಬೆನ್ನಟ್ಟಿದ ಹಂತಕರು ಆತನನ್ನು ಹಿಡಿದು ರಸ್ತೆಗೆ ಎಳೆದೊಯ್ದು ಮನಬಂದಂತೆ ಇರಿದಿದ್ದಾರೆ. ಅಚ್ಚರಿಯೆಂದರೆ, ಘಟನೆ ನಡೆಯುವಾಗ ಹಲವಾರು ಜನರು ರಸ್ತೆಯಲ್ಲಿದ್ದರೂ ಯಾರೊಬ್ಬರೂ ಆತನ ರಕ್ಷಣೆಗೆ ಬರಲಿಲ್ಲ. ಕೆಲವರು ಭಯದಿಂದ ತಮ್ಮ ಮನೆಯ ಬಾಗಿಲುಗಳನ್ನು ಮುಚ್ಚಿಕೊಂಡರೆ, ಒಬ್ಬ ವೃದ್ಧ ವ್ಯಕ್ತಿ ಮಾತ್ರ ಕೋಲು ಹಿಡಿದು ದುಷ್ಕರ್ಮಿಗಳನ್ನು ತಡೆಯಲು ಪ್ರಯತ್ನಿಸಿದ್ದಾರೆ. ಆದರೆ ಅಷ್ಟರಲ್ಲೇ ದಾಳಿಕೋರರು ಅಲ್ಲಿಂದ ಪರಾರಿಯಾಗಿದ್ದರು.
ಮೃತ ಆಕಾಶ್ ಸ್ಥಳೀಯ ನಿವಾಸಿಯಾಗಿದ್ದು, ತಳ್ಳುಗಾಡಿಯಲ್ಲಿ ವ್ಯಾಪಾರ ಮಾಡಿಕೊಂಡು ಜೀವನ ಸಾಗಿಸುತ್ತಿದ್ದ ಎನ್ನಲಾಗಿದೆ. ಘಟನೆಯ ಕುರಿತು ಮಾಹಿತಿ ನೀಡಿರುವ ದೆಹಲಿ ಹೊರ ಜಿಲ್ಲಾ ಡಿಸಿಪಿ, ಈಗಾಗಲೇ ಕೆಲವು ಶಂಕಿತರನ್ನು ಗುರುತಿಸಿ ಬಂಧಿಸಲಾಗಿದೆ ಎಂದು ತಿಳಿಸಿದ್ದಾರೆ. ಹಳೆಯ ದ್ವೇಷವೇ ಅಥವಾ ಬೇರೆ ಯಾವುದಾದರೂ ಕಾರಣಕ್ಕಾಗಿ ಈ ಹತ್ಯೆ ನಡೆದಿದೆಯೇ ಎಂಬ ಬಗ್ಗೆ ಪೊಲೀಸರು ಸಮಗ್ರ ತನಿಖೆ ನಡೆಸುತ್ತಿದ್ದಾರೆ. ದೆಹಲಿಯಂತಹ ಜನನಿಬಿಡ ಪ್ರದೇಶದಲ್ಲಿ ನಡೆದ ಈ ಕ್ರೌರ್ಯ ಮತ್ತು ಜನರ ನಿರುದಾಸಕ್ತಿ ಸಮಾಜದ ಮೌಲ್ಯಗಳ ಬಗ್ಗೆ ಪ್ರಶ್ನೆ ಮೂಡಿಸುವಂತಿದೆ.
