ಚಿನ್ನದ ಉಳಿತಾಯದ ಹೆಸರಲ್ಲಿ ನಡೀತಿದ್ಯ ಮಹಾ ಮೋಸ : ಡಿಜಿಟಲ್ ಗೋಲ್ಡ್ ಸ್ಟಾರ್ಟ್ಅಪ್ ‘ಜಾರ್’ ಕಚೇರಿಗೆ ಸಿಐಡಿ ದಾಳಿ
ಬೆಂಗಳೂರು, ಫೆ.25: ಬೆಂಗಳೂರಿನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಜನಪ್ರಿಯ ಡಿಜಿಟಲ್ ಚಿನ್ನದ ಹೂಡಿಕೆ ವೇದಿಕೆ ‘ಜಾರ್’ (Jar) ಸಂಸ್ಥೆಯ ಕಚೇರಿಯ ಮೇಲೆ ಕರ್ನಾಟಕ ಅಪರಾಧ ತನಿಖಾ ಇಲಾಖೆ (CID) ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ಅನಿಯಂತ್ರಿತ ಠೇವಣಿ ಯೋಜನೆಗಳ ನಿಷೇಧ ಕಾಯ್ದೆ (BUDS Act, 2019) ಉಲ್ಲಂಘನೆಯ ಆರೋಪದ ಹಿನ್ನೆಲೆ ಈ ತನಿಖೆ ಆರಂಭಿಸಲಾಗಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ಸಿಐಡಿ ಅಡಿಯಲ್ಲಿ ಕಾರ್ಯನಿರ್ವಹಿಸುವ ಠೇವಣಿ ವಂಚನೆ ತನಿಖಾ ಘಟಕ ಈ ಕ್ರಮ ಕೈಗೊಂಡಿದ್ದು, ಕಂಪನಿಯ ಡಿಜಿಟಲ್ ಚಿನ್ನದ ವ್ಯವಹಾರ ಮಾದರಿ, ಗ್ರಾಹಕರ ಹೂಡಿಕೆ ಸುರಕ್ಷತೆ ಹಾಗೂ ಚಿನ್ನದ ಸಂಗ್ರಹಣೆ ವಿಧಾನಗಳ ಕುರಿತು ಪರಿಶೀಲನೆ ನಡೆಸುತ್ತಿದೆ. ಗ್ರಾಹಕರು ಹೂಡಿಕೆ ಮಾಡಿದ ಹಣಕ್ಕೆ ತಕ್ಕ ಭೌತಿಕ ಚಿನ್ನವನ್ನು ಹೇಗೆ ಸಂಗ್ರಹಿಸಲಾಗುತ್ತಿದೆ ಹಾಗೂ ಕಸ್ಟಡಿಯಲ್ ವ್ಯವಸ್ಥೆಗಳು ನಿಯಮಾನುಸಾರವಿದೆಯೇ ಎಂಬುದರ ಬಗ್ಗೆ ಅಧಿಕಾರಿಗಳು ಮಾಹಿತಿ ಸಂಗ್ರಹಿಸುತ್ತಿದ್ದಾರೆ.
ಕಂಪನಿ ಈ ಹಿಂದೆ ನೀಡಿದ್ದ ಮಾಹಿತಿಯ ಪ್ರಕಾರ, ಗ್ರಾಹಕರ ಪರವಾಗಿ ಖರೀದಿಸಲಾದ 24 ಕ್ಯಾರೆಟ್ ಶುದ್ಧ ಚಿನ್ನವನ್ನು ಜಾಗತಿಕ ಭದ್ರತಾ ಸಂಸ್ಥೆ Brink’s ನಿರ್ವಹಿಸುವ ಸುರಕ್ಷಿತ ವಾಲ್ಟ್ಗಳಲ್ಲಿ ಸಂಗ್ರಹಿಸಲಾಗಿದ್ದು, ಅದಕ್ಕೆ ICICI Lombard ಸಂಸ್ಥೆಯ ವಿಮೆ ಸೌಲಭ್ಯ ಒದಗಿಸಲಾಗಿದೆ ಎಂದು ಹೇಳಲಾಗಿತ್ತು. ಆದರೆ, ಪ್ರಕರಣ ನ್ಯಾಯಾಲಯದ ವ್ಯಾಪ್ತಿಯಲ್ಲಿ ಇರುವ ಕಾರಣ ಅಧಿಕೃತ ಪ್ರತಿಕ್ರಿಯೆ ನೀಡಲು ಕಂಪನಿ ನಿರಾಕರಿಸಿದೆ.
‘ಜಾರ್’ ಸಂಸ್ಥೆಯ ಕಾರ್ಯವಿಧಾನ
ಬೆಂಗಳೂರು ಮೂಲದ ಈ ಫಿನ್ಟೆಕ್ ಸ್ಟಾರ್ಟ್ಅಪ್, ಸಣ್ಣ ಮೊತ್ತಗಳ ಮೂಲಕ ಡಿಜಿಟಲ್ ಚಿನ್ನದಲ್ಲಿ ಹೂಡಿಕೆ ಮಾಡಲು ಅವಕಾಶ ನೀಡುತ್ತದೆ. ಗ್ರಾಹಕರು ಅಪ್ಲಿಕೇಶನ್ ಮೂಲಕ ಚಿನ್ನ ಖರೀದಿಸಿದಾಗ, ಅದಕ್ಕೆ ಸಮಾನ ಮೌಲ್ಯದ ಭೌತಿಕ ಚಿನ್ನವನ್ನು ವಾಲ್ಟ್ಗಳಲ್ಲಿ ಸಂಗ್ರಹಿಸಲಾಗುತ್ತದೆ. ಅಗತ್ಯವಿದ್ದರೆ ಹೂಡಿಕೆಯನ್ನು ನಗದಾಗಿ ವಾಪಸು ಪಡೆಯಲು ಅಥವಾ ಚಿನ್ನದ ನಾಣ್ಯ/ಆಭರಣ ರೂಪದಲ್ಲಿ ವಿತರಣೆ ಪಡೆಯಲು ಅವಕಾಶವಿದೆ.
ಡಿಜಿಟಲ್ ಚಿನ್ನದ ವಹಿವಾಟು ಏರಿಕೆ
ಡಿಜಿಟಲ್ ಚಿನ್ನದ ವಹಿವಾಟು ದೇಶದಲ್ಲಿ ವೇಗವಾಗಿ ಹೆಚ್ಚುತ್ತಿರುವ ಹಿನ್ನೆಲೆ, 2026ರ ಜನವರಿಯಲ್ಲಿ ಯುಪಿಐ ಮೂಲಕ ನಡೆದ ಡಿಜಿಟಲ್ ಚಿನ್ನದ ಮಾರಾಟವು ₹3,926 ಕೋಟಿಗೆ ತಲುಪಿದ್ದು, 2025ರಿಗಿಂತ ಸುಮಾರು ನಾಲ್ಕು ಪಟ್ಟು ಹೆಚ್ಚಳ ಕಂಡಿದೆ.
ಸೆಬಿ ಎಚ್ಚರಿಕೆ
ಮಾರುಕಟ್ಟೆ ನಿಯಂತ್ರಕ ಸಂಸ್ಥೆ SEBI ಈಗಾಗಲೇ ಡಿಜಿಟಲ್ ಚಿನ್ನದ ಹೂಡಿಕೆಗಳು ಸಂಪೂರ್ಣ ನಿಯಂತ್ರಿತ ಚೌಕಟ್ಟಿನ ಅಡಿಯಲ್ಲಿ ಬರುವುದಿಲ್ಲ ಎಂದು ಎಚ್ಚರಿಕೆ ನೀಡಿದ್ದು, ಹೂಡಿಕೆದಾರರು ಎಚ್ಚರಿಕೆಯಿಂದ ನಿರ್ಧಾರ ಕೈಗೊಳ್ಳಬೇಕೆಂದು ಸೂಚಿಸಿದೆ.
ಹೂಡಿಕೆ ಯೋಜನೆಗಳು
ಜಾರ್ ಸಂಸ್ಥೆ ಪ್ರಸ್ತುತ ವೆಸ್ಟ್ಬ್ರಿಡ್ಜ್ ಸೇರಿದಂತೆ ಹೂಡಿಕೆದಾರರಿಂದ ಸುಮಾರು ₹900 ಕೋಟಿ ($100 ಮಿಲಿಯನ್) ನಿಧಿ ಸಂಗ್ರಹಿಸಲು ಮಾತುಕತೆ ನಡೆಸುತ್ತಿದೆ. ಈ ಹೂಡಿಕೆಯೊಂದಿಗೆ ಕಂಪನಿಯ ಮೌಲ್ಯವು ಸುಮಾರು ₹4,900 ಕೋಟಿ ($550 ಮಿಲಿಯನ್) ತಲುಪುವ ನಿರೀಕ್ಷೆಯಿದೆ.
ತನಿಖೆ ಮುಂದುವರಿದಿದ್ದರೂ, ಕಂಪನಿಯ ದೈನಂದಿನ ವ್ಯವಹಾರ ಚಟುವಟಿಕೆಗಳು ಸಾಮಾನ್ಯ ರೀತಿಯಲ್ಲೇ ನಡೆಯುತ್ತಿವೆ ಎಂದು ವರದಿಯಾಗಿದೆ.
