ಕೆನಡಕ್ಕೆ ಅಜಿತ್ ದೋವಲ್ ಭೇಟಿ; ಖಲಿಸ್ತಾನಿಗಳಿಗೆ ನಡುಕ ಶುರು!
ಒಟ್ಟಾವಾ, ಫೆ.09: ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಅವರು ಎರಡು ದಿನಗಳ ಅಧಿಕೃತ ಪ್ರವಾಸದ ನಿಮಿತ್ತ ಕೆನಡಾಕ್ಕೆ ಆಗಮಿಸಿದ್ದು, ದ್ವಿಪಕ್ಷೀಯ ಭದ್ರತಾ ಸಂವಾದದ ಭಾಗವಾಗಿ ಕೆನಡಾದ ಪ್ರಧಾನಮಂತ್ರಿಯ ಉಪ ಗುಮಾಸ್ತ ಹಾಗೂ ರಾಷ್ಟ್ರೀಯ ಭದ್ರತೆ ಮತ್ತು ಗುಪ್ತಚರ ಸಲಹೆಗಾರ್ತಿ ನಥಾಲಿ ಡ್ರೌಯಿನ್ ಅವರೊಂದಿಗೆ ಮಹತ್ವದ ಮಾತುಕತೆ ನಡೆಸಿದರು. ಈ ಸಭೆಗಳು ಭಾರತ–ಕೆನಡಾ ಸಂಬಂಧಗಳಲ್ಲಿ ಸ್ಪಷ್ಟ ಮರುಸ್ಥಾಪನೆಯ ಸೂಚನೆ ನೀಡಿವೆ.
ಸಭೆಯಲ್ಲಿ ಖಲಿಸ್ತಾನಿ-ಸಂಬಂಧಿತ ಗುಂಪುಗಳಿಗೆ ಸಂಬಂಧಿಸಿದ ಮಾದಕ ದ್ರವ್ಯ ವಹಿವಾಟು, ಸೈಬರ್ ಬೆದರಿಕೆಗಳು ಹಾಗೂ ಉಗ್ರವಾದದ ವಿಚಾರಗಳು ಪ್ರಮುಖವಾಗಿ ಚರ್ಚೆಗೆ ಬಂದವು. ಅಧಿಕೃತ ಪ್ರಕಟಣೆಯ ಪ್ರಕಾರ, ಎರಡೂ ದೇಶಗಳು ತಮ್ಮ ದೇಶಗಳ ಹಾಗೂ ನಾಗರಿಕರ ಸುರಕ್ಷತೆ ಮತ್ತು ಭದ್ರತೆಯನ್ನು ಬಲಪಡಿಸುವ ಉದ್ದೇಶದ ಉಪಕ್ರಮಗಳಲ್ಲಿ ಸಾಧಿಸಿದ ಪ್ರಗತಿಯನ್ನು ಪರಸ್ಪರವಾಗಿ ಒಪ್ಪಿಕೊಂಡಿವೆ.
ರಾಷ್ಟ್ರೀಯ ಭದ್ರತೆ ಮತ್ತು ಕಾನೂನು ಜಾರಿ ಕ್ಷೇತ್ರಗಳಲ್ಲಿ ದ್ವಿಪಕ್ಷೀಯ ಸಹಕಾರಕ್ಕೆ ದಿಕ್ಕು ನೀಡಲು ಹಾಗೂ ಆದ್ಯತೆ ಆಧಾರಿತ ಪ್ರಾಯೋಗಿಕ ಸಹಯೋಗವನ್ನು ಚುರುಕುಗೊಳಿಸಲು ಹಂಚಿಕೆಯ ಕಾರ್ಯಯೋಜನೆಗೆ ಒಪ್ಪಂದವಾಗಿದೆ. ಇದರ ಭಾಗವಾಗಿ, ಎರಡೂ ದೇಶಗಳು ಭದ್ರತೆ ಮತ್ತು ಕಾನೂನು ಜಾರಿ ಸಂಪರ್ಕಾಧಿಕಾರಿಗಳನ್ನು ನೇಮಿಸಿ, ಆಯಾ ಏಜೆನ್ಸಿಗಳ ನಡುವೆ ಕೆಲಸದ ಸಂಬಂಧಗಳನ್ನು ಮತ್ತಷ್ಟು ಬಲಪಡಿಸಲು ನಿರ್ಧರಿಸಿವೆ. ಇದರಿಂದ ದ್ವಿಪಕ್ಷೀಯ ಸಂವಹನ ಸುಗಮವಾಗುವುದರ ಜೊತೆಗೆ ಪರಸ್ಪರ ಕಾಳಜಿಯ ವಿಷಯಗಳ ಬಗ್ಗೆ ಸಮಯೋಚಿತ ಮಾಹಿತಿ ಹಂಚಿಕೆ ಸಾಧ್ಯವಾಗಲಿದೆ.
ಭಾರತವನ್ನು ಗುರಿಯಾಗಿಸಿಕೊಂಡು ನಡೆಯುತ್ತಿರುವ ಮಾದಕವಸ್ತು ಹಣಕಾಸು, ದಾಖಲೆ ವಂಚನೆ, ವಲಸಿಗರ ಮೇಲಿನ ಬಲವಂತ ಹಾಗೂ ಉಗ್ರಗಾಮಿ ನಿಧಿಸಂಗ್ರಹಣೆ, ಬೆದರಿಕೆ ಮತ್ತು ಪ್ರಚಾರದ ಕುರಿತು ದೋವಲ್ ಅವರು ವಿಶೇಷವಾಗಿ ಗಮನ ಹರಿಸಿದರು. ಉಗ್ರಗಾಮಿ ಗುಂಪುಗಳು ನೇಮಕಾತಿ, ಮೂಲಭೂತೀಕರಣ ಮತ್ತು ನಿಧಿಸಂಗ್ರಹಣೆಗೆ ಆನ್ಲೈನ್e ಮಾಧ್ಯಮಗಳನ್ನು ಬಳಸುತ್ತಿರುವ ಹಿನ್ನೆಲೆಯಲ್ಲಿ, ಸಂಘಟಿತ ಸೈಬರ್ ನೀತಿ ಹಾಗೂ ಡೇಟಾ ಹಂಚಿಕೆ ಎರಡೂ ದೇಶಗಳ ಏಜೆನ್ಸಿಗಳಿಗೆ ಅತ್ಯಂತ ಅವಶ್ಯಕವೆಂದು ಸಭೆಯಲ್ಲಿ ಒತ್ತಿ ಹೇಳಲಾಯಿತು.
