ಬೆಂಗಳೂರು: ಸೌಂದರ್ಯದ ಲೇಪನದ ಹಿಂದೆ ಅಡಗಿದ್ದ ಕಳ್ಳಾಟವೊಂದನ್ನು ಕೆಆರ್ ಪುರ ಠಾಣೆ ಪೊಲೀಸರು ಬಯಲಿಗೆಳೆದಿದ್ದಾರೆ. ಶ್ರೀಮಂತ ಮಹಿಳೆಯಂತೆ ವೇಷಧರಿಸಿ ದೇವಸ್ಥಾನ ಹಾಗೂ ಜಾತ್ರೆಗಳಲ್ಲಿ ಚಿನ್ನಾಭರಣ ದೋಚುತ್ತಿದ್ದ ಗಾಯತ್ರಿ ಮತ್ತು ಆಕೆಯ ಪತಿ ಶ್ರೀಕಾಂತ್ ಎಂಬುವವರನ್ನು ಪೊಲೀಸರು ಬಂಧಿಸಿದ್ದಾರೆ. ಬಂಧಿತರಿಂದ ಸುಮಾರು 60 ಲಕ್ಷ ರೂಪಾಯಿ ಮೌಲ್ಯದ 398 ಗ್ರಾಂ ಚಿನ್ನಾಭರಣವನ್ನು ವಶಪಡಿಸಿಕೊಳ್ಳಲಾಗಿದ್ದು, ಇವರ ಐಶಾರಾಮಿ ಜೀವನದ ಹಿಂದಿನ ಕರಾಳ ಸತ್ಯ ಪೊಲೀಸರನ್ನೇ ಬೆಚ್ಚಿಬೀಳಿಸಿದೆ.
ಆರೋಪಿ ಗಾಯತ್ರಿ ತನಿಖೆಯ ವೇಳೆ ನೀಡಿರುವ ಹೇಳಿಕೆ ಅತ್ಯಂತ ಶಾಕಿಂಗ್ ಆಗಿದೆ. ಈಕೆ ತನ್ನ ಮೇಕಪ್ ಮತ್ತು ಸೌಂದರ್ಯವರ್ಧನೆಗಾಗಿ ತಿಂಗಳಿಗೆ ಬರೋಬ್ಬರಿ 5 ಲಕ್ಷ ರೂಪಾಯಿ ಖರ್ಚು ಮಾಡುತ್ತಿದ್ದಳು. ದುಬಾರಿ ಬ್ಯೂಟಿ ಪಾರ್ಲರ್ಗಳಿಗೆ ಭೇಟಿ ನೀಡಿ ಒಂದೇ ಬಾರಿಗೆ 25 ರಿಂದ 30 ಸಾವಿರ ರೂಪಾಯಿ ಪಾವತಿಸುತ್ತಿದ್ದಳು. “ಅಂದವಾಗಿ ಮೇಕಪ್ ಮಾಡಿಕೊಂಡು, ಬೆಲೆಬಾಳುವ ಸೀರೆ ಉಟ್ಟು ಹೋದರೆ ಯಾರೂ ಅನುಮಾನಿಸುವುದಿಲ್ಲ” ಎಂಬ ನಂಬಿಕೆಯಿಂದಲೇ ಈಕೆ ಮೇಕಪ್ ಅನ್ನು ಅಸ್ತ್ರವಾಗಿ ಬಳಸಿಕೊಳ್ಳುತ್ತಿದ್ದಳು. ಕದ್ದ ಹಣದಿಂದ ಐಫೋನ್, ಬ್ರಾಂಡೆಡ್ ಬಟ್ಟೆಗಳನ್ನು ಖರೀದಿಸಿ ಈ ದಂಪತಿ ಮೋಜಿನ ಜೀವನ ನಡೆಸುತ್ತಿದ್ದರು.
ಈ ಜೋಡಿಯು ಪ್ರಮುಖವಾಗಿ ರಾಜ್ಯದ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳು ಮತ್ತು ಜನನಿಬಿಡ ಜಾತ್ರೆಗಳನ್ನು ಗುರಿಯಾಗಿಸಿಕೊಳ್ಳುತ್ತಿದ್ದರು. ಜನರ ನಡುವೆ ಭಕ್ತರಂತೆ ಬೆರೆತು ಮಹಿಳೆಯರ ಮೈಮೇಲಿದ್ದ ಚಿನ್ನವನ್ನು ಕ್ಷಣಾರ್ಧದಲ್ಲಿ ಲಪಟಾಯಿಸುತ್ತಿದ್ದರು. ಕದ್ದ ಚಿನ್ನವನ್ನು ಮಾರಿ ಬಂದ ಹಣವನ್ನು ಮರಳಿ ಆಭರಣಗಳನ್ನಾಗಿ ಪರಿವರ್ತಿಸಿ ಬ್ಯಾಂಕ್ನಲ್ಲಿ ಇಡುವುದು ಅಥವಾ ಐಶಾರಾಮಿ ಶಾಪಿಂಗ್ ಮಾಡುವುದು ಇವರ ನಿತ್ಯದ ಕಾಯಕವಾಗಿತ್ತು. ಸದ್ಯ ಪೊಲೀಸರು ಆರೋಪಿಗಳನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು, ಹೆಚ್ಚಿನ ತನಿಖೆ ಮುಂದುವರಿಸಿದ್ದಾರೆ.
